ئاراستەیا ناڤەرۆکا شعرێن گۆشەیا "خۆشخوانی" یا گۆڤارا زاری کرمانجی
پوختەAbstract
دیرۆکا ڕۆژنامەگەرییا کوردی، ئەڤا ژ چاپکرنا ئێکەم ڕۆژنامەیا کوردی ب ناڤێ "کوردستان ١٨٩٨" دەستپێدکەت و پاشان قۆناغ بۆ قۆناغ چەندین ڕۆژنامە و گۆڤار هاتینە دەرکرن، هەر ئێک ژ ئەوان ژی ل جهـ و دەمەکێ جودا، گۆڤارا زارێ کرمانجی، یاکو ژ ئالیێ "حوسین حوسنی موکریانی"ڤە ل سالا 1926ز ل ڕەواندزێ دەرکەڤتی، گەشەیەکا دی یا دیرۆکا ڕۆژنامەگەرییا کوردی بوو. د گۆڤارا ناڤبریدا، چەندین دروشمێن وەکو "جڤاکی، دیرۆکی، هونەری و ئەدەبی"بوو، مە د ئەڤێ ڤەکۆلینێدا خوە ل ئالیێ ئەدەبیێ ئەڤێ گۆڤارێ کرییە خودان. گرنگییا ئەڤی ڤەکۆلینێ د وێ چەندێدایە خوە ل ناڤەرۆکا شعرێن گۆشەیا "خۆشخوانی" یا گۆڤارێ دایە و ئێخستییە بەر لێکۆلینێ، چونکی هەتا نها ئەو ئالی نەهاتییە لێکۆلین کرن، ژ بەرکو ئەڤێ گۆشێ پترین شعر د خوەدا گرتینە و ب ڕەنگەکێ گشتی ژ سەرجەمێ (٢٤) هژمارێن وێ، ئەڤ گۆشە د ناڤ (١٥) هژمارێن وێدا هەیە، لەورا ئەڤە دێ بت ئاماژەیەک بۆ گرنگیدانا ئەڤێ گۆڤارێ ب ئەدەبیاتێ ب گشتی و شعرێ ب تایبەت، ئەنجامێن ڤەکۆلینێ ئەوێ یەکێ دسەلمینن کو گۆشەیێن هژمارێن دەستپێکی زێدەتر گرنگی ب شعرا کلاسیکا کوردی دایە، بەلێ د هژمارێن دویڤدا زێدەتر ئاراستەیا نەتەوەیی و پەروەردەیی وەرگرتییە، کەواتە وێ چەندێ دیاردکەت کو ئاراستەیا ناڤەرۆکا شعری ژ بابەتی هاتییە گوهۆڕین بەرەڤ ئاراستەیەکا نووژەنڤە. ب ڕەنگەکێ گشتی ناڤەرۆکا بابەتێن وێ (دلداری، شیرەت، نەتەوایەتی، زانستخوازی، شانازیکرن و ڕەخنە). ڕێبازا ڤەکۆلینێ ب ڕەنگێ وەسفی- شرۆڤەکاری هاتییە ئەنجامدان، شعرێن گۆڤارێ هاتینە ڤاڤارتن و پاشان ناڤەرۆکا وان هاتییە دیارکرن.